有好多人問PND新蒲崗仲有無其他野食，等潮友可以一次過去哂，其實呢度好味嘅野，真係唔少架！好似衍慶街咁，雖然平時人流唔算多，不過行到街中間，就會見到有個舖位門前總有十個人企喺度等位，攞籌、入座，呢度雖然細細，但好熱鬧，而且枱枱都食緊「湯包」...！？
呢度嘅招牌小籠包，$35/5個，上枱時見到五個湯包裡面嘅湯汁水位有由底部望上1cm咁高！上枱時蕩吓蕩吓，好吸引！ 呢個小籠包，驟眼睇，都有16摺以上！督督佢，外皮唔會過薄，而係有韌性，夾起兩次都無穿窿漏湯嘅問題～。成個小籠包熱辣辣，一啖入口，完全地爆汁！豬肉餡好鬆化，肉餡攞滿分！肉湯好鮮甜、濃郁，肉餡脂肪比例唔高，油膩感唔重！
麻醬抵再食埋雞絲粉皮$35，粉皮上舖滿雞絲、青瓜絲；麻醬汁厚身濃郁，沉哂喺碟底，要撈幾下先可以將每一塊粉皮都上色上味，條條入口都爽滑、彈牙，
掛汁力強；青瓜好爽口；配埋雞絲真係好香口呀～!
手拉麵小廚
Mon-Sun 11:00-22:30
@新蒲崗衍慶街48號衍慶大廈地下
Search